Sunday, August 24, 2008

Faisal Cup 2008

Lai wa sai, 23/8/2008 ya shani gaw, malaysia nga, tsim yam uhpung uhpawng ni woi awn let, madu organization n-pu na ma ni hpe, hkam ja lam a matu yaw shada let, ginsup baw hpan a myu myu shing jawng poi hpe galaw la lu sai hku re. N-dai hta, uhpung uhpawng shi (10) jan, shang lawm shing jawng ai hpe mu lu ai.

Jahpawt hkying matsat (8:00 am) kaw n-na hpang wa ai, shana de' daw hkying langai (1:00 pm) jan du hkra, gin sup baw hpan a myu myu hpe Kelab Aman K.L ngu ai ginsup pa hta shing jawng lai wa sai. N-dai poi hta, UNHCR kaw na masha kaba langai hte, NBC (USA) kaw na masha kaba langai mung sa du dung lawm let, Ma ni hpe kumhpa shagrau ai lam hta, shang lawm mat wa ai hpe mu lu ai. NGO hkan na, Volunteer marai shi (10) jan mung, n-dai ginsup poi byin tai wa lu na matu, salat she' grit grit rai, shang garum lai wa sai hku re.

N-dai ginsup lamang hta, KRC kawn woi awn let, Jinghpaw Ma ni hte shang shing jawng ai lam galaw lai wa saga ai. Ma ni hpe, uhpung mali garan let, a sak kaji kaba hku hkan n-na, shing jawng lai wa sai. N-dai hta, Num sha ni gaw Netball ginsup ai hta shang shing jawng n-htawm, La sha ni gaw Gaw Din(Football) ginsup ai hta shang shing jawng lawm lai wa sai.

A sak, shi sanit (17) ning n-pu na ni hpe KDO (A), a sak shi mali (14) ning n-pu na ni hpe KDO (B) hte (C), a sak shi (10) ning a n-pu na ni hpe KDO (D) ngu sha mying let, tsang hte' tsang shang shing jawng lai wa sai.

N-dai hta, KDO (A) ni hku n-na, First Runner Up Cup hpe lu la n-htawm, KDO (B) hte KDO (D) ni hku n-na gaw, Second Runner Up Cup hpe lu la mat wa ai hku re. Grai a rawng la hpa rai sai. Masha ni uhpung na, ginsup masha ni hpe yu dat ga nga jang, n-kau kau gaw "Wa Di(uncle)" ngu na zawn re pyi lawm ai.

KRC kawn lit la let, Jinghpaw Ma ni hpe, hpaji lam hta, rawt jat kung hpan galu gaba wa na matu , Setapak hte' Bukit Bintang kaw, laika sharing jawng lahkawng hpaw let, Ma ni hpe laika sharin a chying ya taw nga ga ai. N-dai ginsup poi hta, dai jawng kaw na, Ma ni mahkra ngu na daram shang lawm shing jawng lai mat wa sai hku re.

Grai pyaw ai myi man n-sam ni hte, salat she' grit, jan she' ja rai tim, n-dai ginsup poi hta a tsam htum hkra shakut shaja mat wa ai, Jinghpaw Ma ni hpe yu let, moi na, Ma prat de' pyi dum dum she' nga kau sai.

Ma ni shakut shaja ai a majaw, First Runner Up Cup langai, Second Runner Up Cup lahkawng hte' dum n-ta de' awng padang hte' wa saga ai rai...



KDO (A) U17 ni a, First Runner Up Cup

Masum ting, magawn la mat ga ai.


KDO (B) U14 ni mung, a tsam n-shayawm ai hku re.


Jahkring masha ni, KDO ni hkrai Cup la mat ai nga taw na tsang di, anhte gaw, n-dai sha la ya ai hku re.. :) (KDO U14 )



KDO (D) U10 ni sharawt dat sai, Second Runner Cup...


Matsing: Sumla ni grai naw nga ai. Matut mara(upload) ya mat wa na hku re.

Read more »

Monday, August 18, 2008

Krc Vs Unhcr interpreters

Byin la ai, krc maga na, gaw din gin sup ai ni gaw, unhcr interpreters ni hpang maga de', goal masum ting htawng bang la n-htawm, n-law dum ai majaw, madu goal de' madu goal mi bai htawng bang la let, n-dai gaw din gin sup poi hpe hpung dim dat lai wa masai. :)


Read more »

Friday, August 15, 2008

Madu Yesu woi la kau hkrum sai Slg. A Gu Hkyen (Malaysia)

Madu Yesu hta, yup pyaw mat wa sai, Slg. A Gu Hkyen


Anhte Malaysia du, Jinghpaw Wunpawng Myu Sha ni law malawng gaw, malaysia kaw, mu sa galaw na matu sha, du sa ai n-rai, nam bat masum ngu ai mungdan de', UNHCR kawn lu sa hkra shakut let, sa du shanu shing byin nga ai ni law malawmg rai nga ga ai. N-dai zawn, sa shakut ai hta, mayak mahkak a myu myu hte' lani hte lani tawt lai hkawm sa ra ai wa, kalang kalang gaw, Jinghpaw Buga de' wa n-htawm, Hkau Na she' wa galaw sha mat na zawn nga, myit ni she' pru wa hkra...

Malaysia du Jinghpaw Wunpawng Myu Sha ni kaw na langai rai nga ai, Slg. A Gu Hkyen gaw, lai wa sai July shata 29 ya 2008 hta, Shi grai tsaw ra ai, ning rum ning tau jan hte, kasha marai masum hpe kau tawn da let, Madu Yesu hta yup pyaw mat wa sai. A Gu Hkyen gaw, asak kru shi(60) ning hta, Madu Yesu woi la kau hkrum ai rai nga ai.

N-nan e` gaw, kan machyi ai nga tsun ai majaw, tsi rung de' sa madun n-htawm tsi tsi lajang ai lam ni galaw lai wa sai rai nga ai. Hpang e` gaw, kan jahkring hkring machyi wa ai majaw, a tsawm sha jep dat yu ai shaloi, shat kan cancer rai taw ai hpe mu lu ai hpang, laja lana tsi tsi lajang ai lam ni galaw lai wa sai.


Rai tim, cancer ngu ai gaw, yawng chye ai hte' maren, tsi la yak ai baw re majaw, hpang jahtum tsi rung kaw na, tsi sarawun kaba ni pyi n-hkap la mat ai hpang, Slg. A Gu Hkyen gaw Madu Yesu hta yup pyaw mat wa sai.


N-nga mat wa sai, Slg. A Gu Hkyen gaw Malaysia du ai sanit ning(7) rai sai nga chye lu ai. UNHCR kawn masat tawn sai, tsin yam masha langai mung rai nga ai. UNHCR kawn jaw ai, tsin yam masat lek mat hpe 2003 hta lu la wa sai rai nga ai.


Slg. A Gu Hkyen gaw, tsaw ra la ai ning rum ning tau jan, Nin Sar hte kasha marai masum hpe mungkan ga e` kau tawn da let, Madu Yesu hta yup pyaw mat wa sai lam, tsan ai shara de' du taw nga ai, Makyin Jinghku ni yawng hpe, n-dai KRC blog kawn, shana dat ga ai.

Read more »

Thursday, August 7, 2008