Wednesday, October 22, 2008

MCCM a, jahku(9) ning hpring chyeju shakawn poi

Lai wa sai, October shata 19 ya laban sha ni e, MCCM ( Myanmar Catholic Community Malaysia) hpung ni a 9th ning hpring chye ju shakawn poi lamang hpe St.John Cartheral Nawku jawng wang hta Myen mung mungchying sha myu baw sang ni yawng shang lawm ai hte wu wu di di galaw la sai rai nga ai.

Ndai poi lamang hta Malaysia du Myen mung myu baw sang ni yawng hpe saw shaga ai hte maren Jinghpaw(Kachin),Kaya(karennie), Kayin (Karen), Hkang (Chin),Mon, Myen,Yahkai(Arakan), Sam(Shan) myu baw sang ni yawng madu a myu htung hkying ka hkrang ni hte shang lawm ma ai.

Anhte KRC (Kachin Refugee Committee) ni hpe mung saw shaga ai hte maren, Maigan gara shara kaw mi du taw ai rai tim myu hpe tsaw ai Ma ni a htunghkring Ka hkrang hte shang lawm saga ai.




Read more »

Friday, October 10, 2008

Tsi tsi hkam la nga...

Dai ni na ten, Malaysia Mungdan kaw du nga ai anhte Jinghpaw wunpawng myu sha ni law law wa ru yak jam jau machyi makaw hkrum nga ai.

Slg. Naw Awn Kareng gaw lai wa sai, July shata kawn ya dai ni na ten du hkra shi a ana a majaw Malaysia Mungdan Mung shawa tsi rung kaba (Neurology Ward, General Hospital Kaula lumpur) kaw tsi tsi hkam la nga ai.

Byin ai lam gaw, lai wa sai shata man masum hta shi ningrum ningtau hte ma kaji gaw Kota Raya ngu ai shara e, Rela ngu ai Mungdan shim lam hpung kawn rim na htawng hta shata masum daram sharen da ai hkrum n-htawm, Htawng kaw na madu jan lawt wa ai hpang bungli kaw na wa nna, hka shin shat sha ngut ai hpang akajawng sha, dung nga ai lahkum kaw na galau ta leng mat ai kawn n’dum mat ai rai nga ai. Tsi hpaji hku tsun ga nga yang akajawng sha, Bawnu sai lam lasa dan mat ai (Stroke) ngu ai ana rai nga ai. Ya na zawn byin mat ai lam gaw Malaysia Mungdan hta ruyak jam jau law law hkrum sha ai majaw n-dang hkam na mung mai byin nga ai.

Malaysia Mungdan gaw Maigan masha ni a matu tsi tsi hkam la na matu tsi manu jahpu grai laja nga ai. Ya dai ni na ten du hkra rai yang, Myen gumhpraw sen 30 daram ma nga sai re. Shan nu wa ni yawng marai 7 rai n-na, ningrum ningtau hte Ma mali rai nga ai. Ma hpung dim wa gaw, Polio ana hpe hkam sha nga ai rai nga ai.

Shi a tsi tsi gumhpraw ni hpe Mungkan tsin yam mung hpawng rung (UNHCR), Jinghpaw wunpawng tsin-yam rung (KRC), ACTS NGO hpung hte shi a Jinghku Jingyu ni yawng jawm garum ai hte tsi tsi hkam la nga ai hku re.

Ya mani kaw nna, loi loi hkam kaja wa sai rai nga ai. Shi a lam hte seng n-na, chye mayu ai lam ni nga yang e-mail krcmalaysia@gmail.com kaw mai san ai hku re. Hkawp myit su a laika ni hpe bai htai shalai wa na ga ai.


Tsi Tsi hkam la nga ai, Slg. Naw Awn, Kareng

Tsi Tsi hkam la nga ai, Slg. Naw Awn, Kareng

Tsaw ra ai, Ningrum Ningtau jan hte' rau tsi rung kaw

Myu Sha lam hta,
KRC Rung

Read more »

Friday, October 3, 2008

Maigan

Ka Lajang Ai: Du Re

Mungkan hta masha marai hkum shagu gaw galu kaba mayu ai hkrai rai nga ai. Dai majaw shani shagu madu a asak hkrung lam hta shakut sha ja let hkawm sa ai ni hkrai rai nga ga ai. Dai ni na ten, Malaysia Mungdan de n’tsa lam , lawu lam hku du sa wa ai anhte Jinghpaw Wunpawng myu sha ni, lani hte lani ram ram law wa nga sai.

N’tsa lam hku na du sa wa ai ni gaw nau wa yak hkak jam jau ai lam n-nga ai. Rai ti mung n’pu lam hku sa wa ai ni gaw ram ram wa jam jau hkrum n-htawm, du wa ai rai nga ai. Num sha Ma ni gaw lawu lam hku sa wa na matu shim lam n-nga ai. Law malawng gaw hkrun lam hkan (agent) ni e, roi kau hkrum ai ni she law nga ai. Kahpu kanau ni hte mi rau rai ti mung Agent ni hpe hkrit ra ai hte hkrun lam hta hkrit ra ai hte rai madu a kajan kasha langai ngai hpe roi kau ai rai ti mung hpa matai htang n-mai rai nga ai.

Mabyin langai hta: “Ngai hkrai sha sa wa ai. Myen mung kaw mung galaw sha yak la ai majaw Malaysia de manang ni tsun yang grai galaw sha mai ai nga na, hkrun lam mung nchye ai sha Agent ni hte matut la nna, lawu lam hku na sa wa n-ngai. Thai hte Malaysia ga jarit kaw Agent ni gaw ngai hpe manam jarawp hta yup shangun ai. Ngai mung hkrun la hta grai pu ba mat na, yup gawk chying-hka zaw la na malap kau ai. Jahpawt daw kaw Myen ga shaga ai la mali ngai hpe n’gup pat na roi kau ma ai. Dai kaw na ngai Malaysia kaw du mat ai.


N-dai zawn Ru yak jam jau hkam, Ja gumhpraw law law ma hkam hkra re du wa ai anhte Jinghpaw Wunpawng myusha ni wa, gara hku asak hkrung nga ga ai kun?

Ya dai ni na ten Malaysia Mungdan gaw anhte Jinghpaw wunpawng myu sha ni a (recruit) training sharin ai shara langai rai nga ai. Du wa ai ni kadai mung Myen mung hpaji kade chye ai wa, grai lu su ai wa mi rai rai bungli galaw sha ra ai gaw maren sha rai nga ai. Maigan de' du mat wa ai anhte Jinghpaw wunpawng myusha ni wa kade daram myu tsaw myit rawng nga sai kun?

Myu shayi sha ni hpe yu ga, Maigan la hpe she htang kaba Myit num she shang mat sai. Yawng hpe gaw n’tsun mayu ai. Maigan la nga ti mung (Foreigner) Shan hpraw la hpe tsun mayu ai nre. Hpa n-re ai Myen myu bawsang ni hpe tsun mayu ai. Myen hpe nju ai nga na Myen mung kaw na pru wa sai nga, ya gaw Myen la hte she bai sum tsaw tsaw, shara shagu kaw bai yup hkawm, Ma hkum ni byin, Ma bai shaprai rai, myu a n’li kaja gaw gara kaw na pru sa na ta?

“Moi gaw ngai hpe la na nga na ya gaw shi mung Myen mung de bai wa mat sai. Bai sa wa na nga gaw tsun ai rai ti mung ya du hkra ndu wa ai. Ya Ma shangai ten gaw du wa, shangai na gumhpraw mung n-lu ai”. N-dai zawn n-pawt n-dung n-nga ai myu sha ni hte sumtsaw tsaw hkrup ai.

Myen la hte anhte Jinghpaw la sha ni shai ai lam gaw Malaysia du ai na sai, n-na ai rai nga ai. Myen la ni gaw Malaysia du na Malay ga hpe mung grai chye shaga rai, Jinghpaw num sha ni hpe bungli ni tam ya masu, Nga shara ni tam ya, bungli offday lu yang woi wam, rai amyu myu garum masu na hpang jahtum gaw Ma kumhpa bai jaw da rai jam jau ai myu shayi sha ni mung law law nga ai. Nang Myen la hte sum tsaw tsaw ai ngu tsun yang Jinghpaw la kaja gara kaw nga sa ta nga chye tsun ai. Jinhpaw la ni gaw Tsa , Kani, Chyaru chyu lu bungli mung n’kam galaw nga bai tsun , Jinghpaw la kasha ni hpe bungli galaw shakut mayu wa hkra lakawn na n’gun jaw na gaw shayi sha ni a lit mung rai nga ai.

Bai la kasha ni hpe bai yu ga! nga yang mung, bungli lu yak ai hta bungli bai lata chyai taw. Bungli lu sai nga yang mung shata shabrai n-law ai bai nga, madu gaw grai ram sai kun ngu yang, grai ram ai gaw bai n-rai rai nga ai. Ja gumhpraw tam ai lam hta mung, num sha ni gaw la kasha ni hta grau shakut, La kasha law malawng gaw shara htawt ai langai sha rai nga ai.

Moi myen mung kaw nga ai shaloi na hte maren, Maigan du sai nga na gawng mat, shakut na myit gaw n-rawng, shata htum shata shabrai lu yang manang ni hte Tsa seng kaw dung na shata mi ting n-lu n-sha tam da ai gumhpraw lana mi hte sha Tsa mari lu kau rai nga ai. N-kau kanu kawa ni madu a kasha hpe Maigan de dat dat yang shi a arawn alai mi galai mat kun? Nga grai myit mada let dat dat, ndai kaw grau Myen mung hta na, nang hpam malu masha gaw hkum ai hte kanu kawa hte tsan sai majaw kam ai hku wanglu wang lang Kani, Tsa chyaru hpe lu sha nga sai.

Jinghpaw la kasha ni hpe num kasha ni tsaw ra wa na matu gaw anhte la kasha ni ram ram wa tsaw ra myit chye madun ra nga ai. Laga Maigan la kasha ni hte anhte jinghpaw la kasha ni shai ai lam gaw tsaw ra myit n-chye madun ai lam re. Ga shadawn, Myen la langai gaw Jinghpaw num kasha hpe ra sai nga yang shawng ningnan bungli shawng tam ya, dai hpang off day hkan shopping ni woi hkawm, shana hkan bungli na wa yang sa tau, sa sa rai aten ahkying grai jaw let hkwi hkalem la nga ai. Dai tsaw ra myit gaw jahkring sha rai nga ai. Hpang gaw num sha wa she bai bau ra ai mung grai law nga ai.

Dai majaw dai ni na ten Malaysia Mungdan hta du nga sai myu sha ni yawng myu tsaw myit rawng wa na matu gaw nang ngai yawng a lit rai nga mali ai.

Read more »