2009 ning KRC mung shawa zuphpawng hte' mu gun ningnan lata hpawng hpe a ngwi a pyaw sha galaw la ngut

Sa du dung lawm ai salang ni

2009 ning, KRC a mung shawa zup hpawng hte' mu gun ningnan lata hpawng hpe, 26.1.2009 ya shani a ngwi a pyaw hte' sha galaw la ngut saga ai. N-dai lamang hta, sa du dung lawm ai shawa masha gaw (130) daram sa du shang lawm lai mat wa sai hku re. Lamang hpe daw langai hte' lahkawng garan n-htawm, daw langai lamang hta gaw, 2008 ning KRC gun hpai wa ai, magam bungli ni hte' seng n-na, du sa ai shawa masha ni hpe, tang madun ai lam galaw lai wa sai. Daw lahkawng hku n-na gaw, 2009 ning hta KRC kaw magam gun na, mu gun ningnan ni hpe bai lata jasan ai lam galaw lai wa sai hku re.

Mungdan Dawng Hkawn hpe hkungga jaw nga yang

N-dai hta, 2009 ning KRC a Ningbaw hku n-na Sara Labang Naw Seng hpe lata jasan da lu sai. Lata Hpung(nomination committee) ni, Ningbaw ngu n-na lata tawn ai Sara Labang Naw Seng hpe shawa masha yawng mung myit hkrum sai majaw shi hpe Ningbaw shara hta shatsam dat lu sai.

Ningbaw Malai, Amu Madu, Ningtau Amu Madu shara ni hta, mu gun na masha ni hpe, 'lata hpung' ni lata da ai masha ni, shawa de' shachyen dat ya ai shaloi gaw, shawa n-kau mi hte' 'lata hpung' ni a lapran ning mu loi shai hkat wa ai hpe mu lu ai. Dai majaw, 'lata hpung' ni hku n-na, shanhte lata da ai, masha ni hpe n-ra jang, gara masha hpe mahtang grau htap htuk manu na ngu ai hpe, tsun ya marit nga let, 'lata hpung' ni jahkrat da ai rip kawp manga a n-pu e', shawa hte' 'lata hpung' ni, ning mu htai lai hkat lai wa sai.

Ningmu htai lai hkat nga yang

N-dai hta, gum rawng gum sa(democracy) ladat hku n-na, shawa masha grau law hkap la ai masha hpe seng ang ai shara ni hta, shatsam wa ai shaloi gaw, mi na 'lata hpung' ni daw dan da sai hku sha mahtai pru wa ai majaw, lata da sai magan gun ningnan ni hpe, shi shara hte' shi shatsam da lu sai.

Zuphpawng hpe shana de' hkying manga daram hta a ngwi a pyaw sha shangut la lu sai lam shana dat ga ai.

Ningbaw: Sara Labang Naw Seng

Ningtau Ningbaw: Sara Aram

Amu Madu: Salang Roben

Ningtau Amu Madu: Maji Brang Nan

2009 ning hta KRC kaw mu gun ap-nawng na, KRC Ningbaw Ningla ni

Contact Us

https://www.facebook.com/krc.shiga/about

Saw shaga dat ga ai.

KRC a shaning shagu galaw nga ai, 'Lata Poi'(Election) hpe, du wa na January shata 26 ya, shana de' daw 1:00pm kaw n-na 5:00pm du hkra, Chinese Assembly Hall kaw galaw mat wa na ga ai. 'Lata Hpung'(Nomination Committee) ni lata san da sai, 2009 ning laman mu gun na, mu gun ningnan ni hpe shawa masha ni hpang de' shachyen ya mat wa na re.

N-dai poi lamang hta sa du shang lawm na matu, myu sha yawng hpe hkungga let saw shaga dat ga ai.

Rohingya ni, UNHCR rung shawng kaw, myit ra ai lam madun

Dai hpawt(21.1.2009) UNHCR rung shawng kaw, myen-gala(Rohingya) ni, ganoi marai latsa daram, myit ra madun ai lam galaw lai wa masai. ABDF(All Burma Democratic Force) ni woi awn n-htawm, UNHCR(Malaysia) rung hpe, shan hte lu gying ai a hkaw a hkang jaw na matu hpyi shawn lai wa masai.

Minutes 20 daram a ten hta, shan hte hpai sa wa ai laika hpe Ningbaw marai langai mi kaw na, yawng hpe hti dan ngut ai hpang, UNHCR rung kaw na, Officer kaba langai mi pru wa n-na, shi hte' minutes masum daram tsun shaga ngut n-na, hpawng hpe hpung dim dat la manu ai.

Officer wa hku n-na, "Nanhte a lam hpe lahta de' matut tang madun ya na n-ngai. Lahta kaw na, mahtai lu wa ai hte' nanhte hpe bai shana ya na" nga dat ai hpe, na dat lu ai hku re.

N-dai myit ra madun ai lamang hta, malay balik ni marai shi jan, sa sin zawng taw ai hpe mu lu ai.

N-dai myen-gala(Rohingya) ni hpe, UNHCR kaw na a hkyak nau n-la ai lam gaw, n-dai ni gaw, nambat masum mungdan du tim, manghkang grai shapraw ja ai ni re majaw re lam chye lu ai. Rohingya ni hpe UNHCR kawn tsin yam masat lekmat gaw htuk jaw nga ai rai tim, RST(Resettlement) madang(step) hta, jahkring da ya ai, case ni grai nga ai lam chye lu ai.

Photos By: KRC

Ma ni a Christmas Hkalum Poi

New Generation jawng kaw na, Jawng Ma ni hte' woi awn ai Sara lahkawng

Saint Joseph's Community kaw na saw shaga hkrum ai majaw, New Generation(KRC kawn hpaw ning htan da ai, Laika sharin jawng) Jawng kaw na, Ma kaji pang ni hte', Ma ni a Christmas Hkalum Poi hpe dai ni galaw la lu saga ai. N-dai poi hta, Community law law na Ma ni mung shang lawm ai hpe mu lu ai.

Shani 12:30pm daram kaw na hpang ai n-dai poi hpe, shana de' daw hkying manga 5:00pm daram kaw angwi apyaw hte' sha lu shangut la saga ai. N-dai poi lamang hpe NGO kaw na, volunteers ni shang law garum mat wa ma ai. Du sa ai community shagu na Ma ni hpe grai pyaw hkra woi awn lai wa masai. Du sa ai Ma ni yawng rai yang, marai latsa jang daram rai ma ai.

Lu hpa sha hpa sha ngut ai hpang gaw, du sa ai Ma ni a ka hkrang ni hte' madun dan lai wa sai. Du sa ai Ma ni yawng hpe, kumhpa hpra' hpra' hte' dai ni na Ma ni a Christmas hkalum poi hpe angwi apyaw hte' sha galaw la ngut saga ai.

Geneva hte matut mahkai nga sai KRC rung

Dai ni na ten Malaysia kaw jung da nga ai Jinghpaw Wunpawng Tsin-yam rung gaw Jinghpaw Wunpawng amyu sha ni rawt jat galu kaba sa wa na lam hta dangdi dang dep ai made Mungkan Mungdan kaba ni hte matut mahkai shakut shaja nga ai.

Mani December shata praw 05,2008 ya shani hta Mungkan Munghpawng Tsin-yam rung daju Geneva kaw na Ms. Line Pedersen(Associate Self-Reliance Officer) nga ai wa gaw KRC rung de sa du gawan let, Rung staff ni, Jinghpaw myu shayi sha ni hte Mani sum sai hte anhte myu sha ni a gam maka hte rawt jat galu kaba sa wa na lam ni hpe hpaji daw n'gun jaw mat wa ai.

Shi sa du ai lam madung gaw Malaysia mungdan hta nga nga ai anhte Jinghpaw masha ni a nga sat nga sa lam ni , galaw lu galaw sha lam ni hpe kata lam hkrak chye mayu ai majaw rai nga ai.

Rakhine Myen- Gala (Rohingya) ni UNHCR rung shawng e N'gun Madun Poi galaw

Lai wa sai, December shata praw 3-5 ya laman Myen mung masha Rakhine ( Myen-gala Rohingya ) ni gaw UNHCR rung shawng e shanhte a ra sharawng ai lam hpe sim sa let n'gun madun lai wa sai rai nga ai.

Ya yang na UNHCR a masa lam ni gaw Rohingya ni hpe Resettlement n'jaw ai rai nga ai. Hpa na nga yang moi lai wa sai ten ni hta Third country ngu ai nambat masum Mungdan de resettle jaw wa ai rai ti mung hkap la ai Mungdan kaw sa du nga ai shaloi, madu du nga ai mungdan atsuya hpe aput a'ngun na nna, n'ta ni wa nat, Madu hkum madu sat si rai, ' anhte hpe ndai zawn jam jau jaw na rai yang gaw hpa na ndai de woi la ai rai nga' Mungdan atsuya hpe mara shagun rai nga ai majaw Maigan gara Mungdan mung nkam hkap la mat ai rai nga ai. Dai ni na ten Malaysia Mungdan hta Rohingya 50000 daram nga ai rai nga ai.