Sunday, November 23, 2008

Duwa Mahkaw Hkun Sa hte' hkrum shaga ai lam galaw

KNO(Kachin National Organization) hte ENC(Ethnic Nationalities Council) a Ninggawn amu madu rai nga ai, Duwa Mahkaw Hkun Sa gaw, mani(22.11.2008) shana hkying (7) e', Malaysia kaw nga ai, KRC, KNO, WunJat kaw na magam gun ni hte' Myu sha lam yen hte' seng n-na KRC rung e', tsun bawng bang jahkrup hpaji jaw lai wa sai hku re.

Zuphpawng kaw sa du dung lawm ai, myit su ni hku n-na, langai hpang langai, madu a mying, a myu, myen mung gara kaw na, ya' gara magam bungli hta shang tsap gun hpai nga ai ni hpe shachyen ngut ai hpang, Duwa Hkun Sa hku n-na, mung masa hte' seng ai, shi a mahkrum madup ni hte' sa du dung lawm ai myitsu ni hpe hpaji jaw lai wa sai re.

Anhte Jinghpaw mung hpe awm dawm a hkaw a hkang(snr) gum rawng gum sa ladat hte' up hkang ai Mungdan(snr) Mungdaw langai byin wa na matu, hpa baw ladat ni lang let galaw hkawm sa wa ra ai, langai hte' langai, uhpung hte' uhpung myit hkrum ra ai, mung masa hpe ganing re ai ladat myit jasat ni hte' galaw ra ai nga ni hpe, Duwa Hkun Sa hku n-na, sang lang dan mat wa ai hku re. Bai n-na, anhte Jinghpaw ni, media hpe a kyu rawng rawng chye jai lang jashawn ra ai nga n-na mung hpaji jaw ga tsun mat wa sai hku re.

"Myu hpe n-gup hte' sha n-tsaw ga. Ta tut magam bungli ni hte' tsaw ga" nga n-na mung tsun shadum lai wa sai hku re. Shi hku n-na mung, England mungdan kaw mai nga nga ning leng e', Myu hte' Mungdan a matu ngu myit let, England kaw na, Thailand de' htawt sit wa n-htawm, mung masa lam yen hta, KNO/ENC a ning gawn amu madu hku n-na, shang lawm gun hpai nga ai re lam chye lu ai. KRC ningbaw Maran Di La tsun dan wa ai hta, "N-dai Duwa Hkun Sa gaw, htawng (7) ning rawng lai wa sai rai n-na, htawng lahkawng (2) ning hta rawng nga yang, myen asuya hku n-na shi hpe, "Nang hpang de' mung masa bai n-galaw sai nga ai hpe lekmat lu htu yang gaw, nang hpe dat ya na" nga tsun tim, Duwa hku n-na, "ning dang" kau ai hte', htawng (7) ning rawng lai wa sai re" nga n-na tsun dan wa ai. Dai hpang, Duwa Hkun Sa hpe, KNO a ningbaw rai nga ai, Bawm Wang La Raw shaga la n-na, KNO Ginjaw a, Ning gawn amu madu lit shatsam da hkrum sai re lam chye lu ai.

Duwa tsun n-gun jaw lai wa ai hta, Mungdan Gawda Tara (Constitution) hpe hti n-na hka-ja yu na matu mung n-gun jaw lai wa sai hku re. KNO ni ka da ai, Kachin State Constitution Draft hpe mung hti n-na, mu mada ai lam ni hpe tsun dan marit, nanhte tsun dan jang she', ra rawng ai lam ni hpe anhte hku n-na, bai gram lajang n-htawm, Second Draft hpe bai dip shapraw mat wa na re lam tsun lai wa sai hku re.

UN(United Nation) kaw na, myen asuya hpe galoi mung tsun nga ai, "tri-partite dialogue" byin wa sai ngu ga. Myen asuya hte' tsun shaga shing jawng na a tsam, hpaji chye ai masha anhte kaw marai kade' nga sai kun ?? nga ai ga san(question) gaw, mung masa, myu sha lam yen hta shamu shamawt nga ai, myitsu salang ni a kraw kata de' a dawt shang bang mat wa sai hku re.

No comments:

Malaysia Mungdan hta e shanu nga ai Jinghpaw wunpawng myusha ni KDO-KRC Kachin Development Organization (20) Ning hpring poi lamang galaw

  KRC Ningbaw Sum Hka La Seng Poi Amu madu Shd. Hpaude Jaw Tu Hkawng & Shy. Maru Lu Lu Seng Poi Shabyin Shatai Komiti