Friday, March 13, 2009

Wunpawng tsin yam ni hpe, USA mungdan de' grau sha-ang ya nga


Malaysia kaw tsin yam lekmat lang da sai, Jinghpaw Wunpawng myu sha ni hpe, madu sa na, nambat masum mungdan de' UNHCR kawn sha-ang ya ai hta, USA mungdan de' grau law sha-ang ya wa ai lam chye lu ai. N-dai hta, maning hte' dai ning na laman, mungdan hkrat wa ai ni gaw, USA mungdan hkrat ai ni law malawng rai nga ai lam, KRC a jahpan hpe la kap n-na chye lu ai.

Malaysia kaw tsin yam shawk la n-na, nambat masum mungdan ni de' htawt sit nga mat sai, Jinghpaw Wunpawng myu sha ni gaw, 200-250 daram du wa sai lam chye lu ai. Rai tim, laga hpu nau ni hte shingdaw yu yang, grai naw n-law ai hpe mu lu ai. Ya yang, malaysia kaw tsin yam lekmat shawk la na matu, la ding da nga ai myu sha ni mung, lani hte' lani grau law wa ai hpe mu lu ai. 2009 ning KRC a jahpan hta, tsin yam lekmat lu da sai ni hte' n-lu da shi ai ni yawng gum hpawn dat yang, 3000 daram du nga sai hpe mu lu ai.

Myen asuya a, n-tara uphkang zingzi zingzat roi rip sha ai a majaw, mungdan kata tam lu tam sha yak hkak wa ai majaw, Malaysia mungdan de' lani hte' lani du shang wa ai myu sha ni kaw na law malawng gaw, malaysia kaw bungli galaw let UNHCR tsin yam lekmat shawk la n-htawm, nambat masum ngu ai mungdan kaba ni de' htawt sit nga na matu yaw shada ai ni law ai hpe mu lu ai. Hkrit tsang ra ai malaysia kaw, myu sha ni a shani shagu na sak hkrung hkawm sa lam gaw, krung sinwa makau na lam kasha hta hkawm taw ai hte' bung la nga ai.

Ya yang e', mungkan sut masa hkrat sum ai dam hpe, malaysia du Jinghpaw Wunpawng myu sha ni mung hkrum sha nga sai hku re. Bungli shamat kau ai ni lani hte' lani grau law wa n-htawm, bungli n-nan bai tam la na mung grau yak hkak wa ai hpe mu lu ai. Rai tim, K.K hpe kam sham ai, anhte Jinghpaw Wunpawng myu sha ni hpe, Karai Wa gaw n-malap da na re ngu ai hpe kam let, Wunpawng gam maga tsawm htap wa hkra, anhte ni yawng, n-gun atsam dat let shakut shaja ra nga ga ai.

0 comments: