Malaysia mungdan hta, Balik (sh) Police, Oprasy rim hkrum wa yang.

Malaysia Mungdan hta hkawm sa lekmat Passport nlu ai Maigan masha ni a matu grai hkrit tsang ra nga ga ai. Lama Jinghpaw Wunpawng myu sha marai langai ngai laika Buk (passport) nlu ai Balik rim hkrum ai rai yang byin ai shara kaw hpyi nem tawng ban na gumhpraw loi li jaw rai mai lawt ai. Nlu ai rai yang Ph. 016-2502359, 016-3223706, 0163223159 ni hpe ading tawk matut mahkai mai ai.

Sadi ra ai lam langai gaw Balik ni hpe madu a gumhpaw sumbu nmai shaw madun ai. Balik rim hkrum ai rai yang rim hkrum ai shara, Bilik rung, ni chye da ra na. Madu a Jinghku (sh) manang langai ngai rim hkrum ai rai yang lawan dik ai hku KRC rung de matut mahkai wa marit. Rim ai shani kawn n’htoi 14 ya laman Balik dap kaw na nlu shaw la ai rai yang Tara rung (Court) de du mat na. Dai hpang tara daw dan ai hte Htawng Degree jahkrat ai hkrum na rai nna, Malaysia Mungdan a htawng ni de sa ai hkrum na rai nga ai.

Htawng kaw kade na hkra nga ra na ta? Shata Kru kawn Manga ning mung na mat chye ai. Dai Htawng kaw na pru ai rai yang Malaysia Mungdan Maigan masha rim jep dap ( Immigration) kawn Htawng masha ni hpe Thai lamu ga jarit de sa kau, masha langai hpe (RM 300), Myen mung gumhpraw 105000 Kyats hte Dut sha kau ma ai. Kadai ni mari la ma ta? Agent ngu ai masha hpaga la ni mari la ma ai.

Agent ni a lata hta kade hkrit tsang ra a ta? Agent ni a lata hta bat mi jan nang hpe shaw la ai masha nnga yang, Panglai de Nga hkan ai Sanghpaw li kaw dut sha kau ma ai . Panglai de dut sha hkrum ai ni gaw dai Panglai n’tsa hta Jan pru Jan shang Hka hte Lamu sha mu lu nna, wa lam sha mat kau rai , Panglai ntsa kaw lup wa sha tai ra mat nga ai. THAI ga jarit kaw na Malaysia Mungdan de bai nhtang shang na nga yang Agent ni hpe Malaysia (RM 1900), Myen 650000kyats jaw ra ai.

Tara nshang ai bungli, Ga shadawn: game gin-sup shara, CD copy galaw ai shara hte nang hpam malu masha lu sha ai ni hpe rim hkrum ai rai yang KRC kawn lit nlu la ya ai. Dai ni na teng anhte amyu sha ni law law wa nang hpam lu sha ai majaw rim hkrum ai Ramma ni law law wa Malaysia Htawng kaji kaba hkan rim sharen da ai hkrum nga ma ai.

Myu sha yawng Lapu zawn zai rawng ai ladat hte Malaysia tsin-yam prat hpe hkam sharang let tawt lai lu mu ga law.

Myusha Lam Hta,

KRC

Malaysia kaw na, ri dam ngu ai, n-dai zawn re hpe tsun ai rai nga ai