Jinghpaw tsinyam langai damya kashun hkrum

 Jinghpaw Wunpawng Tsinyam Hpung (KRC) kaw na tsinyam amyu shayi langai gaw lai wa sai April shata, Kuala Lumpur, Setapak lawk, Jalan Genting lam maw ntsa hta damya kashun katut ai lam chye lu ai.
Setapak lawk, Danau Kota Flat, Block-D hta nga ai Shayi Ah Ji (39 ning) gaw April (18) ya Laban jahpawt hkying 3:10 Am daram ten hta shi a bungli ngut nna nta wa na matu lam de pru wa ai ten Cycle jawn ai shabrang 2 akajawng sha du wa nna damya sa kashun ai re lam chye lu ai.
“Damya marai lahkawng re. Cycle hte sa wa ma ai. Langai mi gaw cycle ntsa na n yu ai sha la taw ai. Kaga langai gaw cycle ntsa na yu nhtawm, dawng mi jan galu ai hpun pyen pa hte seng chyinghka pat nga ai lauban hpe shawng sa abyen dat ai. Lauban na lata daw mat ai. Ngai mung kajawng nna hprawng kaw gumhpraw sumbu nhpye lawm ai nga yang, ngai hpe mung bai shachyut abyen da ai. Baw hte lahpa kaw masum lang adup hkra ai. Ta kaw na nhpye gashun mat ai.” nga nna Shayi Ah Ji, Ningnaw shiga dap de tsun dan wa ai.
Damya kashun mat ai nhpye hta RM 180, UN maisau pa hte arung arai loi mi lawm mat ai hpe chye lu ai. Baw hta adup katut ai majaw ningma hpe tsi rung kaw 12 lang chywi ra ai hpe mung chye lu ai.
Damya lahkawng yan hpe atsawm n matsing dat ai raitim gala amyu n-sam re hpe gaw matsing ai nga nna shi matut tsun dan wa ai.
Ndai zawn re ai kashun kashe manghkang mabyin gaw Malaysia mungdan hta nga nga ai tsinyam ni hta jahkring hkring hkrum sha ra nga ai re. Shayi Aji zawn kashun hkrum ai, jahkrit shama hkrum ai ni law law mung nga ma ai re.
Ndai mabyin a nau n na ai shawng e sha mung, Setapak lawk kaw sha, Steven Corner lam numbraw hta Jinghpaw Wunpawng amyu shayi sha langai mung lam hkawm nga ai kaw, hpang hku nna cycle jawn ai damya ni gaw akajawng sha gumhpraw sumbu kashun mat wa ya ai mabyin hpe mung chye lu ga ai.
Malaysia mungdan e shimlam n lu ai tsinyam ni a prat hta ndai zawn re ai mabyin ni hpe tinang hkrai sadi maja ai hta lai nna, shinglum ai makawp maga shara myit mada n mai nga ai re.
Tsa Doi La
18-April-2010, Sunday