ဂျေယန့်ဒုက္ခသည်စခန်းက အပြာရောင်မျက်လုံးပိုင်ရှင်လေး
ဂျေယန့်ဒုက္ခသည်စခန်းက ထူးဆန်းတဲ့ အဖြာရောင် မျက်လုံးပိုင်ရှင် ၂နှစ်အရွယ် မိန်းကလေးငယ် Dingring Seng Lu Awng
အဆိုပါ ဂျေယန့်ဒုက္ခသည်စခန်းတွင်ခိုလှုံနေသော မဒိန်ရိန်ဆိုင်းလုအောင်သည် မွေးစကတည်းက မျက်ဆံအိမ်အပြာရောင်ဖြစ်ပြီး ၄ ယောက်မြောက်သမီးဖြစ်ကြောင်း၊ ကလေးငယ်၏ အပြုအမူများသည် အခြားကလေးများထက် ထူးခြားမှုရှိကြောင်း မိခင်ဖြစ်သူ ဒေါ်လထော်ရွယ်ဂျီး ကချင်သတင်းဌာနသို့ ပြောသည်။
“သူ့မျက်လုံးက သူအစ်ကို၊ အစ်မတွေနဲ့မတူဘူး အပြာရောင်ဟုတ်တယ်။ သူတယောက်ထဲပဲ အဲလိုဖြစ် နေတာ၊ ဘာပစ္စည်းဖြစ်ဖြစ်မျက်လုံးနဲ့အာရုဏ်စိုက်ကြည့်ပြီး ဆော့ကစားတယ်။ စကားတော့ မပြောသေးဘူး ဒါမဲ့အခု လမ်းတော့လျှောက်နိုင်ပြီ၊ ကျမခေါ်တာ အခုချိန်ထိသူမကြားသေးဘူး အသံတွေကို နားမလည်ဘူး နားမကြားဘူးထင်တယ်” ဟု ပြောသည်။
အပြာရောင်မျက်လုံးပိုင်ရှင် မ ဒိန်ရိန်ဆိုင်းလုအောင်သည် ၁ နှစ်အရွယ်ထိ သာမန်ကလေးများနှင့်မတူဘဲ ကိုယ်ပျော့နေပြီး ခေါင်းမထောင်နိုင်ခြင်းကြောင့် မိခင်ရင်ဘတ်ဖက်သာ ပိုးရကြောင်းသိရသည်။
မိခင်သည် ကလေးငယ် မျက်စိမြင်နေရသော်လည်း နားလေးနေခြင်းကြောင့် မြစ်ကြီးနားဆေးရုံသို့ ပြသ ကုသပေးချင်သော်လည်း ငွေကြေးပြဿနာရှိသောကြောင့် မသွားနိုင်သေးကြောင်းပြောသည်။
ဂျေယန့်ဒုက္ခသည်စခန်းမှ ကျန်းမာရေးတာဝန်ရှိသူများက အဆိုပါ ကလေးငယ်၏ မျက်လုံးနှင့်ပတ်သက်၍ ရောဂါဟုတ်မဟုတ်မခန့်မှန်းနိုင်သေးသောကြောင့် ဒုက္ခသည်များကူညီသည့် ကျန်းမာရေးအဖွဲ့မှ ဆရာဝန်ကြီးများလာရောက်ချိန်တွင် ပြသပေးရန်ရှိကြောင်း ဂျေယန့်ဒုက္ခသည်ကျန်းမာရေးတာဝန်ခံ လဘန်နော်ဂျာ ကချင်သတင်းဌာနသို့ပြောသည်။
“သူ့မျက်ဆံထဲမှာ စိန်ပွင့်လိုရှိနေတာလေ၊ မျက်စိတော့ အရမ်းကောင်းတယ်။ သူမျက်ဆံအိမ်က ဘယ်သူ့ ကလေးနဲ့မှ မတူဘူး သာမန်မျက်စိထက်ပိုမြင်မယ်လို့ထင်တယ် အရမ်းထူးဆန်းတယ် အထဲက အရည်ကိုက ပြာနေတာ”
ယခုချိန် ကလေးငယ်၏ ထူးခြားမှုနှင့် စကားမပြောသေးနိုင်ခြင်းကို ဂျေယန့်ကျန်းမာရေးစခန်းတွင် စမ်းသပ်ရန် မျက်စိနှင့် ဆိုင်သည့် ကရိယာများမရှိခြင်းကြောင့် စစ်ဆေးမှုမလုပ်နိုင်ကြောင်း ပြောသည်။
၎င်းကလေးငယ်ကို ကိုယ်ဝန်လွယ်ထားခဲ့ချိန် လိုင်ဇာအနီးတိုက်ပွဲများဖြစ်ပွားလာသောကြောင့် မိသားစုများ နမ်ဆန်ယန် အောင်ဂျာရွာမှ ဂျေယန့် စစ်ပြေးဒုက္ခသည်စခန်းသို့ အလန့်တကြား ထွက်ပြေးတိမ်းရှောင်ခဲ့ရပြီး စိတ်ပိုင်းဆိုင်ရာစိုးရိမ်မှု၊ အားငယ်မှုများ ရင်ဆိုင်ခဲ့ရသည်ဟု မိခင်ဖြစ်သူ ဒေါ်လထော်ရွယ်ဂျီးပြောသည်။
အစိုးရနှင့် ကချင်လွတ်မြောက်ရေးတပ်ဖွဲ့ KIA ကြား ၂၀၁၁ ခုနှစ်ကတည်းက တိုက်ပွဲဖြစ်ပွားခဲ့ရာ ယခုချိန်ထိ တိုက်ပွဲများရပ်စဲသွားခြင်းမရှိသေးသောကြောင့် ဒုက္ခသည်များနေရပ်သို့ပြန်နိုင်ရန် အလှမ်းဝေးနေဆဲလည်းဖြစ်ကြောင်း ဒုက္ခသည်ကြည့်ရှုသူများကပြောသည်။
By KNG
No comments:
Post a Comment